COVID - 19
09-03-2020 17:13

ირმა ინაშვილი აცხადებს, რომ მემორანდუმის იმ ნაწილს, რომელიც მართლმსაჯულების საკითხებს ეხებოდა, ხელი არ მოაწერა

ირმა ინაშვილი აცხადებს, რომ მემორანდუმის იმ ნაწილს, რომელიც მართლმსაჯულების საკითხებს ეხებოდა, ხელი არ მოაწერა

„პატრიოტთა ალიანსის“ ლიდერი ირმა ინაშვილი აცხადებს, რომ მემორანდუმის იმ ნაწილს, რომელიც მართლმსაჯულების საკითხებს ეხებოდა, ხელი არ მოაწერა.

„კარგია, რომ საარჩევნო სისტემასთან დაკავშირებით შედგა შეთანხმება და კონსენსუსი. მართალია, ჩვენი პოლიტიკური პარტია სამპროცენტიან ბარიერს უჭერდა და დღესაც უჭერს მხარს, მაგრამ ჩვენ გამოვედით ჩვენი ქვეყნის და სახელმწიფოს ინტერესებიდან, არ დავაბრკოლეთ და ხელი არ შევუშალეთ დღევანდელ კონსენსუსს, ამიტომ შევუერთდი ამ მემორანდუმს და მოვაწერეთ ხელი, რომელიც ითვალისწინებს 120/30-ზე, ერთპროცენტიან ბარიერს თავისი ჩამკეტი მექანიზმებით“, – განაცხადა ირმა ინაშვილმა.

მისივე თქმით, შემდგომში მუშაობა გაგრძელდება ოლქების განაწილებაზე, რაც უკვე ტექნიკური საკითხია.

„პატრიოტთა ალიანსის“ ლიდერმა ასევე აღნიშნა, რომ კანონმდებლობაში რჩება ბლოკების შექმნის შესაძლებლობა და ბლოკებისთვის დაწესებული ხუთპროცენტიანი ბარიერი.

„დღეს წარმოდგენილი იყო ორი ტიპის მემორანდუმი. ერთი ეხებოდა საარჩევნო სისტემას და საერთო კონსენსუსისთვის რომ ხელი არ შეგვეშალა, მას შევუერთდით. მეორე ეხებოდა ე.წ. პოლიტიკური პატიმრების თემას და ცხადია, მე მას ხელი არ მოვაწერე. საარჩევნო სისტემასთან დაკავშირებით შეთანხმება შედგა“, – დასძინა ირმა ინაშვილმა.

საქართველოში აშშ-ის საელჩომ ხელისუფლებისა და ოპოზიციის წარმომადგენლების მიერ მიღწეული შეთანხმების ტექსტი გაავრცელა. შეთანხმების მეორე ნაწილში, რომელსაც „პატრიოტთა ალიანსმა“ ხელი არ მოაწერა, ნათქვამია:

„ჩვენ, ხელისმომწერი პარტიები, ჩავერთეთ დიალოგში 2020 წლის საპარლამენტო არჩევნების თავისუფალ და სამართლიან გარემოში ჩატარების უზრუნველსაყოფად, რაც საქართველოს ხალხის ნებას ასახავს. ჩვენ ვეთანხმებით საქართველოს მართლმსაჯულების სისტემაში უმაღლესი სტანდარტების დაცვისა და მათი დახვეწისკენ სწრაფვის მნიშვნელობას. მიუხედავად განსხვავებული აზრისა, ყველანი ვთანხმდებით, რომ აუცილებელია რეაგირება ქმედებებზე, რომლებიც შესაძლოა, აღქმულ იქნას, როგორც სასამართლო და საარჩევნო პროცესების არასათანადო პოლიტიზაცია და მომავალში მსგავსი ქმედებები თავიდან უნდა იქნას აცილებული. მივესალმებით პრეზიდენტის წინადადებას, მისი საკონსტიტუციო უფლებამოსილების ფარგლებში, თავისუფალი, სამართლიანი და გამჭვირვალე საარჩევნო პროცესის ხელშეწყობასთან დაკავშირებით“, – ნათქვამია შეთანხმების ტექსტის მეორე ნაწილში.

[ წყარო - https://1tv.ge/ ]

კომენტარები
        მსგავსი სიახლეები