COVID - 19
23-03-2020 22:03

აკაკი ზოიძე: მარნეულში დაინფიცირებული ქალის 90 კონტაქტიდან შემდგომი ტალღის სახით 1700-მდე კონტაქტია იკვეთება

აკაკი ზოიძე: მარნეულში დაინფიცირებული ქალის 90 კონტაქტიდან შემდგომი ტალღის სახით 1700-მდე კონტაქტია იკვეთება

მარნეულსა და ბოლნისში პრობლემატური საკითხი არის ის, რომ ძალიან ბევრი კონტაქტი იკვეთება, რაც დაახლოებთ უკვე 1 700-მდეა, - ამის შესახებ ჟურნალისტებს პარლამენტის წევრმა, აკაკი ზოიძემ მთავრობის ადმინისტრაციაში პრემიერ-მინისტრთან შეხვედრის დასრულების შემდეგ განუცხადა.

“ძალიან ბევრი კონტაქტი იკვეთება. დაახლოებით არის 1700-მდე იმ 90 კონტაქტიდან შემდგომი ტალღის სახით და ყველას გამოკვლევა და შემდგომში იზოლაცია საჭირო. მხოლოდ ტესტირების ჩატარებას აზრი არ აქვს, თუ მერე იზოლაციის და კარანტინის შესაბამისი ზომები არ იქნება მიღებული“, - აღნიშნა ზოიძემ.

მარნეულისა და ბოლნისის მუნიციპალიტეტები მკაცრ საკარანტინო რეჟიმზე მას შემდეგ გადავიდა, რაც მარნეულში კორონავირუსით ქალი დაინფიცირდა, რომლის ინფიცირების წყაროს დადგენაც ვერ მოხერხდა.

21 მარტს საქართველოში საგანგებო მდგომარეობა ამოქმედდა. კორონავირუსი ქვეყანაში უკვე 54 ადამიანს დაუდასტურდა. მათგან ხუთი ინფექციური კლინიკიდან უკვე გაეწერა. სულ გამოჯანმრთელდა 8 პაციენტი. ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.

წყარო: imedinews.ge

კომენტარები
        მსგავსი სიახლეები