COVID - 19
17-04-2020 20:54

სამების საკათედრო ტაძარში გარდამოხსნის წესი მაცხოვრის დატირების გარეშე შესრულდა

სამების საკათედრო ტაძარში გარდამოხსნის წესი მაცხოვრის დატირების გარეშე შესრულდა

სრულიად საქართველოს კათოლიკოს-პატრიარქმა, უწმინდესმა და უნეტარესმა ილია მეორემ ყოვლადწმინდა სამების საკათედრო ტაძარში გარდამოხსნის წესი შეასრულა. ამ დღეს ღვთისმსახურება იესო ქრისტეს ჯვარცმას, ჯვრიდან გარდამოხსნასა და დასაფლავებას იხსენებს.

დიდი პარასკევი დიდი მარხვის ყველაზე მძიმე დღეა. ამ დღეს ტაძრებში წირვა არ აღესრულება, რადგან, სახარების თანახმად, ადამიანთა ცოდვებისგან გამოსახსნელად უფალმა საკუთარი თავი მსხვერპლად შესწირა.

დიდი პარასკევის სერობა მაცხოვრის ჯვრიდან გარდამოხსნასა და დასაფლავებას ეძღვნება და ჩვეულებრივ, 14:00 საათზე აღევლინება, რადგან ბიბლიური ლიტერატურით, იესო ქრისტე ჯვარზე სწორედ ამ დროს მიიცვალა. მსახურების დაწყებამდე ტაძრის შუაგულში მზადდება ამაღლებული, ყვავილებით მორთული სადგამი - “საფლავი”, საკურთხეველში კი, წმინდა ტრაპეზზე, დააბრძანებენ გარდამოხსნას, საგანგებოდ მოხატულ დიდ ქსოვილს, რომელზეც საფლავში ჩასვენებული მაცხოვარია გამოსახული.

გარდამოხსნა უწმინდესმა სასულიერო პირებთან ერთად საკურთხევლიდან გამოაბრძანა, ტაძარში სამჯერ შემოატარეს და ტაძრის შუაგულში სადგამზე დააბრძანეს. შესრულდა საგალობლები, რომლებიც იესო ქრისტეს ვნებასა და ჯვარცმას ასახავს. თუმცა, არ შესრულებულა დატირება (გალობა), რომელიც დავით გურამიშვილის ლექსზე "ვაი რა კარგი საჩინოს" მიხედვით არის დაწერილი და პატრიარქის კურთხევით შეიქმნა.

გარდამოხსნა ტაძრის შუაგულში არასრული სამი დღის განმავლობაში რჩება, რაც იმის სიმბოლოა, რომ მაცხოვარი აღდგომამდე სწორედ სამი დღე იყო საფლავში.

აღსანიშნავია, რომ სამების საკათედრო ტაძარში მისულ მრევლს კორონავირუსის გამო შექმნილი სიტუაციიდან გამომდინარე, უსაფრთხოების მიზნით, სტიქაროსნებმა პირბადეები დაურიგეს. რიტუალის შესრულების დროს, პირბადეები სასულიერო პირების ნაწილსაც ეკეთა.

[ წყარო - https://www.interpressnews.ge/ ]

კომენტარები
        მსგავსი სიახლეები