COVID - 19
23-05-2020 13:41

მარინა ეზუგბაია სომხეთის ჯანდაცვის მინისტის განცხადებაზე: ჩვენთან არსებული ყველა მონაცემი სწორია, არც ერთი შემთხვევა არაა დამალული

მარინა ეზუგბაია სომხეთის ჯანდაცვის მინისტის განცხადებაზე: ჩვენთან არსებული ყველა მონაცემი სწორია, არც ერთი შემთხვევა არაა დამალული

ჩვენთან არსებული ყველა მონაცემი სწორია. არც ერთი შემთხვევა არაა დამალული. დღეს გვყავს 728 პაციენტი, - განაცხადა თბილისის ინფექციური საავადმყოფოს სამედიცინო დირექტორმა, მარინა ეზუგბაიამ სომხეთის ჯანდაცვის მინისტრის განცხადების საპასუხოდ.

„ჭეშმარიტება ერთია, გვაქვს 728 დადასტურებული შემთხვევა. დამთავრდა. ამას არავითარი კომენტარი არ სჭირდება. ფაქტების დამალვას აზრი არ აქვს. საუბარს იმაზე, თუ ვის რა აზრი აქვს, არავითარი მნიშვნელობა არ აქვს“ - განაცხადა მარინა ეზუგბაიამ.

სომხეთის ჯანდაცვის მინისტრი არსენ ტოროსიანი აცხადებს, რომ სომხეთის ეპიდემიის საწინააღმდეგო სისტემა საქართველოზე უკეთესია. სომხეთის საზოგადოებრივი საბჭოს სხდომაზე მინისტრმა ასევე განაცხადა, რომ სომხეთში საქართველოდან ჩასულ არაერთ ადამიანს კორონავირუსი დაუდგინდა. ტოროსიანს საქართველოს ოფიციალურ სტატისტიკურ მონაცემებში ეჭვი შეაქვს.

საქართველოში კორონავირუსით კიდევ 5 ადამიანი დაინფიცირდა, 14 კი გამოჯანმრთელდა.

საერთო ჯამში ქვეყანაში კორონავირუსი 728 ადამიანს დაუდასტურდა, აქედან 509 უკვე გამოჯანმრთელდა. საქართველოში კორონავირუსით გარდაიცვალა 12 ადამიანი.

კარანტინის რეჟიმში 3614 ადამიანი რჩება, სტაციონარში მეთვალყურეობის ქვეშ კი - 316.

ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა. 21 მარტს საქართველოში საგანგებო მდგომარეობა ამოქმედდა, 31 მარტიდან კი - საყოველთაო კარანტინის რეჟიმი.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.

წყარო - imedinews.ge

კომენტარები
        მსგავსი სიახლეები