COVID - 19
17-06-2020 13:55

რამზან კადიროვი განცხადებას ავრცელებს, სადაც ვასამბეკ ბოკოვის საქართველოში დაკავებას ეხმაურება

რამზან კადიროვი განცხადებას ავრცელებს, სადაც ვასამბეკ ბოკოვის საქართველოში დაკავებას ეხმაურება

„ეხო მოსკვის“ რედაქცია ჩეჩნეთის პრეზიდენტ რამზან კადიროვის განცხადებას ავრცელებს.

განცხადებაში კადიროვი რუსეთის ფედერაციის მოქალაქის, ვასამბეკ ბოკოვის საქართველოში დაკავებას ეხმაურება.

„მედიაში აქტიურად ციტირებენ საქართველოდან შეუმდგარი ჟურნალისტის განცხადებას. ამტკიცებენ, რომ მის წინააღმდეგ იგეგმებოდა ჩეჩნეთის რესპუბლიკის ხელისუფლების მიერ დაკვეთილი თავდასხმა. სიმართლე გითხრათ, მე საერთოდ არ მაინტერესებს ბედით განაწყენებული ადამიანების იგავები. ისინი მოქნილად ცდილობენ, წარმოაჩინონ საკუთარ თავი საინფორმაციო ველში, თუმცა მათ სულ უფრო ღრმად იწოვს მორევი. მინდა, მხოლოდ ვთქვა, რომ დღეს ქართული პოლიტიკა ცარიელია ისევე, როგორ უკრაინული. ოდესღაც წარმატებით განვითარებად ქვეყნებს მართავენ ადამიანები, რომლებიც ხალხის რეალურ პრობლემებზე ფიქრის ნაცვლად, სულელურ განცხადებებს აკეთებენ. ამჯერად ამბობენ, რომ დააკავეს დაქირავებული მკვლელი, რომელიც კადიროვის შეკვეთით ქართველ ვაიჟურნალისტზე თავდასხმას გეგმავდა“, – აცხადებს კადიროვი.

როგორც ჩეჩნეთის პრეზიდენტი აღნიშნავს, „თუ ვინმე მისი დავალებით მოქმედებს, ის ამ დავალებას შეასრულებს“.

„ბატონებო, დამიჯერეთ, თუ ვინმე ჩემი დავალებით მოქმედებს, ის დავალებას შეასრულებს, ხოლო თუ დავალება ჩუმად უნდა შესრულდეს, მაშინ ვერავინ, მით უმეტეს, ღრმა უძრაობაში მყოფი თქვენი ქვეყნები ამის შესახებ ვერ გაიგებენ… უმჯობესია, გიორგი გაბუნია დადგეს მუხლებზე და პატიება ითხოვოს, ბოდიში მოიხადოს მომხდარის გამო. მან შეურაცხყო არა ერთი ადამიანი, არამედ ყველა რუსი. მივმართავ საქართველოს ხელისუფლებას, მიიღოს ზომები, რომლებიც ხელს შეუწყობს ამ მოქალაქის ხელახლა აღზრდას. ვურჩევ მას, გააკეთოს სწორი დასკვნები და თავისი გონება წესრიგში მოიყვანოს. წინააღმდეგ შემთხვევაში, ვიმეორებ, ის ჩემს მტრად დარჩება. რაც შეეხება უკრაინულ მხარეს, რომელმაც, როგორც ამტკიცებენ, თავდასხმის დამკვეთის შესახებ ინფორმაცია გადასცა, მინდა ვურჩიო, სამომავლოდ უფრო სერიოზულად მოიქცეს და არ გაიხადოს თავი საზოგადოების დასაცინი. ასეთი ცნობები მტკიცებულებების ბაზასთან ერთად მაინც გაავრცელეთ. ისედაც, ბოლო წლებია, პიარს მხოლოდ ჩემი სახელის ხარჯზე იკეთებთ. არ გამოგდით საკუთარ ხალხთან მუშაობა, შედეგად პერიოდულად ახსენებთ საკუთარ თავს ჩემი სახელის გამოყენებით. სხვათა შორის, ამ პიარისთვის ჩემს წინაშე ვალში ხართ. გახსოვდეთ ეს!“ – ნათქვამია კადიროვის განცხადებაში.

ტელეკომპანია „მთავარის“ გენერალურმა დირექტორმა ნიკა გვარამიამ განაცხადა, რომ ჩეჩნეთის პრეზიდენტ რამზან კადიროვის დაკვეთით ჟურნალისტ გიორგი გაბუნიას ლიკვიდაცია იყო დაგეგმილი. ლიკვიდაციას კი, რუსეთის მოქალაქე, ინგუშეთში დაბადებული ვასამბეკ ბადრის ძე ბოკოვი გეგმავდა, რომელიც საქართველოს კონტრტერორისტულმა სამსახურმა დააკავა.

ამასთან, სახელმწიფო უსაფრთხოების სამსახურში აცხადებენ, რომ ვასამბეკ ბოკოვი დაკავებულია შეკვეთით განზრახ მკვლელობის მომზადების საქმის ფარგლებში და მოუწოდებენ ყველას, დაუზუსტებელი ინფორმაციის გავრცელებისგან თავი შეიკავონ.

„მასმედიის საშუალებებით გავრცელებულ ინფორმაციასთან დაკავშირებით, გვსურს გაცნობოთ, რომ სახელმწიფო უსაფრთხოების სამსახურის კონტრტერორისტული ცენტრის მიერ, ყალბი დოკუმენტის შეძენა-შენახვისა და გამოყენების ბრალდებით, საქართველოს სისხლის სამართლის კოდექსის 362-ე მუხლის პირველი ნაწილით დაკავებულია რუსეთის ფედერაციის მოქალაქე.

ბრალდებული ვ.ბ.-ს დაკავება განხორციელდა შეკვეთით განზრახ მკვლელობის მომზადების ფაქტზე დაწყებული სისხლის სამართლის საქმის გამოძიების ფარგლებში, რომელსაც სახელმწიფო უსაფრთხოების სამსახურის კონტრტერორისტული ცენტრი, შესაბამისი ოპერატიული ინფორმაციის საფუძველზე აწარმოებდა“, – ნათქვამია სუს-ის ინფორმაციაში.



ავტორი - ქეთი ჩოხელი

[ წყარო - https://1tv.ge/ ]

კომენტარები
        მსგავსი სიახლეები