COVID - 19
23-06-2020 15:51

ეკა ბესელია აცხადებს, რომ მხარს დაუჭერდა კაზინოებში საქართველოს მოქალაქეების შეშვების აკრძალვას

ეკა ბესელია აცხადებს, რომ მხარს დაუჭერდა კაზინოებში საქართველოს მოქალაქეების შეშვების აკრძალვას

პარლამენტის დამოუკიდებელი დეპუტატი, ეკა ბესელია აცხადებს, რომ მხარს დაუჭერდა კაზინოებში საქართველოს მოქალაქეების შეშვების აკრძალვას.

როგორც ბესელიამ საგაზაფხულო სესიის პლენარულ სხდომაზე „ლატარიების, აზარტული და მომგებიანი თამაშობების მოწყობის შესახებ“ საქართველოს კანონში ცვლილების შეტანის თაობაზე“ პროექტის შესახებ საუბრისას აღნიშნა, მომხრეა იმ პრინციპის, რომ რიგი ქვეყნების მსგავსად, აღნიშულ დაწესებულებებში ქვეყნის მოქალაქეებს შესვლა ეკრძალებათ და ნებადართული მხოლოდ უცხოელებისთვისაა.

მისივე თქმით, საჭიროა რადიკალური ნაბიჯები ამ სფეროს რეგულირების კუთხით.

„ეს თემა ძალიან ემოციური და მტკივნეულია საზოგადოების დიდი ნაწილისთვის. უამრავი ტრაგიკული ისტორიის მომსწრენი გავხდით. ამას რომ მკაცრი რეგულაცია სჭირდება, ყველა ვთანხმდებით. ყველა ხელისუფლებას უჭირს გადადგას ნაბიჯები, რომლებიც შეიძლება ფინანსური თვალსაზრისით არ იყოს მომგებიანი, მაგრამ მეორე მხარეს დგას არც მეტი არც ნაკლები, ადამიანების სიცოცხლე, ჯანმრთელობა, ოჯახების უსაფრთხოება. ამ სფეროს რეგულირება მკაცრი ხელის გარეშე წარმოუდგენლად მიმაჩნია. ძნელად მგონია სანქციებით ეს ვერაგი სენი დავძლიოთ. ამას მოწოდებები არ ჰყოფნის. მგონია, რომ რადიკალური ნაბიჯებია საჭირო. მე პირადად მხარს დავუჭერდი როგორც მაგალითად ფინეთშია, რამდენიმე სხვა ქვეყანაშია, სადაც საკუთარ მოქალაქეებს კაზინოში არ უშვებენ და მხოლოდ უცხოელებისთვისაა ნებადართული. მე ასეთ პრინციპს მხარს დავუწერდი და მგონია, რომ ჩვენს მოქალაქეებს დააზღვევდა იმ უბედურებისგან, რაც გაუაზრებელ ნაბიჯს მოჰყვება ხოლმე. ასევე მხარს დავუჭერდი ასეთი დაწესებულებების ცენტრალური ადგილებიდან გატანას. ასევე, რეკლამის საკითხის მკაცრ რეგულირებას,“ - განაცხადა ბესელიამ.



წყარო : www.interpressnews.ge

კომენტარები
        მსგავსი სიახლეები