COVID - 19
26-06-2020 19:55

ლევან დავითაშვილი: არც ერთი კილოგრამი ყურძენი არ დარჩება ჩაუბარებელი

ლევან დავითაშვილი: არც ერთი კილოგრამი ყურძენი არ დარჩება ჩაუბარებელი

ვფიქრობ, მხოლოდ „ქართული ოცნების“ ხელისუფლებაა ის ხელისუფლება, რომელმაც მევენახეობისა და მეღვინეობის განვითარებაში უზარმაზარი წვლილი შეიტანა. მევენახეობა-მეღვინეობის დარგი განვითარების აბსოლუტურად სხვა დონეზე ავიდა. მხოლოდ ჩვენი ხელისუფლების პირობებში მოხერხდა ის, რომ ფერმერის მიერ მოწეული მოსავალი, პრობლემების გარეშე, მთლიანად დაბინავებულია, - ამის შესახებ გარემოს დაცვისა და სოფლის მეურნეობის მინისტრმა, ლევან დავითაშვილმა პარლამენტში განაცხადა. უწყების ხელმძღვანელი პრემიერ-მინისტრის გიორგი გახარიას მიერ მთავრობის საქმიანობის 2019-2020 წლის ანგარიშის წარდგენას ესწრება.

„სახელმწიფოს მაღალი სოციალური პასუხისმგებლობა გააჩნია. წელს გათვალისწინებულია, დაახლოებით, 40 მილიონი ლარის ოდენობის სუბსიდია. პირდაპირი სუბსიდია რქაწითელის ჯიშის ყურძნისთვის იქნება განკუთვნილი, ვინაიდან ჭარბი სწორედ რქაწითელის ჯიშის ყურძენია და ძირითადად პრობლემები სწორედ ამ ჯიშის ყურძნის ჩაბარებასთან არის დაკავშირებული. ექსპორტის თითქმის 80%-მდე, 70%-ზე მეტი, წითელყურძნიანი ჯიშისგან წარმოებული წითელი ღვინოებია, მხოლოდ 20-25%-ია თეთრი ღვინოები. მომავალ კვირას მთავრობა მიიღებს დადგენილებას რთველის ღონისძიების ხელშეწყობის შესახებ. ეს იქნება მკაფიოდ გაწერილი პირობები, რომელიც შეჯერებული და დარგთან შეთანხმებულია. ეს არის ის მაქსიმუმი, რაც არსებული ფინანსური შესაძლებლობებით გაკეთდა მოსახლეობისთვის. ხაზგასმით მინდა აღვნიშნო, რომ არც ერთი კილოგრამი ყურძენი, ისევე როგორც წინა წლებში, ჩაუბარებელი არ დარჩება. სახელმწიფო საწარმოს რესურსები იქნება სრულად გამოყენებული იმისთვის, რონ ის ჭარბი მოსავალი, რომელსაც კერძო სექტორი ვერ შეიძენს, დაბინავდეს“, - განაცხადა ლევან დავითაშვილმა.

[ წყარო - https://imedinews.ge/ ]

კომენტარები
        მსგავსი სიახლეები