COVID - 19
27-06-2020 19:50

ფეიკ ნიუსთან "მებრძოლი" ვებ-გვერდები ხშირად თავად გვატყუებენ! - TINP.GE-ს განცხადება

ფეიკ ნიუსთან "მებრძოლი" ვებ-გვერდები ხშირად თავად გვატყუებენ! - TINP.GE-ს განცხადება

Tinp.ge (დღეს პოლიტიკაში) ახალი და საინტერესო ინტერნეტ გვერდია საქართველოში. ჩვენ ვცდილობთ მკითხველს მედია დაიჯესტი შევთავაზოთ. Tinp.ge იმიტომ არის კომფორტული, რომ ერთ საიტზე თავს ვუყრით ყველა საინტერესო ამბავს, რასაც ქართული და უცხოური მედია ავრცელებს. ჩვენი ჯგუფი მკაცრად იცავს საავტორო უფლებებს და ყველა გამოყენებული სტატიის წყარო მითითებულია. აღსანიშნავია, რომ გვერდის პარტნიორები არიან სანდო და ობიექტური ინტერნეტ გამოცემები. იმ შემთხვევაში, თუ პოსტის ნამდვილობასთან დაკავშირებით კითხვები გვიჩნდება, მის გადამოწმებაზე ვიწყებთ მუშაობას და მხოლოდ უტყუარობის დადასტურების შემთხვევაში ვაქვეყნებთ.


2 კვირის წინ tinp.ge-მ მკითხველს შესთავაზა სტატია, სათაურით „ჯანმოს ეპიდემიოლოგის სკანდალური აღსარება -„ეპიდემია არ არსებობს!“ (ქართული წყარო: http://hotnews.ge და სხვა ათამდე გამოცემა). ვიდრე მასალა ჩვენს ვებგვერდზე მოხვდებოდა, სხვადასხვა წყაროებში რამდენჯერმე გადავამოწმეთ. მხოლოდ მას შემდეგ, რაც მივიღეთ ცნობები, რომ ეს განცხადება დასტურდება, ჩვენს მკითხველს ინტერვიუ შევთავაზეთ. პოსტში საუბარია, რომ „ჯანმრთელობის მსოფლიო ორგანიზაციაში კოვიდ 19-თან ბრძოლის ჯგუფის ერთ-ერთმა ხელმძღვანელმა, ამერიკელმა ინფექციური დაავადებების ეპიდემიოლოგმა, მარია ვან კერჰოვმა სენსაციური განცხადება გააკეთა. მისი თქმით, კარანტინისა და კომენდანტის საჭიროება არ არსებობს და ყველაფერი ეს ხელისუფლებების მოთხოვნას წარმოადგენდა. იგივე შინაარსის ინფორმაცია შემდეგ უცხოურ ვებ-გვერდებზეც გამოქვეყნდა: cnbc.com, fishki.net, коронавирус.ru და სხვა.


შეშფოთებით გვინდა აღვნიშნოთ, რომ ზემოთხსენებული სტატიის მიზეზით tinp.ge-ზე განხორციელდა ხელისუფლების მიმართ ლოიალურად განწყობილი პირების და მედიის მიზანმიმართული თავდასხმა. შტურმი მთელი 2 კვირის განმავლობაში მიმდინარეობდა. გვადანაშაულებდნენ სიცრუის გავრცელებაში და ეჭვქვეშ აყენებდნენ კონკრეტული სტატიის შინაარსს, რომელსაც 80 000 ადამიანი გაეცნო. ყურადღებას შეგნებულად არ აქცევდნენ, რომ სტატიის ავტორი ჩვენი ინტერნეტ გვერდი კი არა, ქართული და უცხოური მედიაა.


მეტიც, სახელმწიფო დაფინანსებით შექმნილმა „პირველი არხის“ „ანტიფეიკმა“ (antifake.1tv.ge), ისე რომ ჩვენთან დაკავშირება და საპასუხო კომენტარის მოპოვება არცკი უცდია, tinp.ge-ს ხსენებული სტატია, სპეციალურ პოსტში, ფეიკად მონათლა, თან hotnews-თან ერთად პასუხისმგებლობა ჩვენც დაგვაკისრა.
მთელი პასუხისმგებლობით ვაცხადებთ, რომ „დღეს პოლიტიკაში“ არასდროს არ გამოქვეყნებულა ყალბი, გადაუმოწმებელი ინფორმაცია. მცირედი უზუსტობების არსებობის შემთხვევაში სტატიაზე პასუხისმგებელია მითითებული წყარო.


მოვუწოდებთ საქართველოს საზოგადოებრივი მაუწყებლის „პირველი არხის“ გუნდს, დაუყოვნებლივ წაშალონ სტატია, სადაც tinp.ge უსამართლოდ დაადანაშაულეს. ხალხის ფულით დაფინანსებულმა „ანტიფეიკმა“ იქნებ სამომავლოდ მაინც სცადოს, ფეიკ ნიუსის წინააღმდეგ შექმნილი პლატფორმა გამოყენებული არ იქნას სიყალბის გასავრცელებლად.

P.S. არ გვწყენია არაჯანსაღი კრიტიკა mythdetector.ge (მითების დეტექტორი)-ს მხრიდან, რომელიც თამარ კინწურაშვილთან ერთად, უკვე წლებია ფეიკ ნიუსთან მებრძოლის სტატუსით, თავად იქცა ყალბი ახალი ამბების ექსპორტიორად...

თამარ კინწურაშვილი და მისი "მითების დეტექტორი" პირველად არ ახორციელებენ თავდასხმას ქართულ მედიასაშუალებებზე. "პირველი არხის" ყოფილი ხელმძღვანელი, რომელსაც სახელმწიფო ქონების თაღლითურად განიავებას ედავებიან, ცდილობს მასმედიაში "რუხი კარდინალის" სახელი დაიმკვიდროს და პირადი შეხედულებებისამებრ გადაწყვიტოს რა არის სიმართლე და რა ტყუილი.

კომენტარები
        მსგავსი სიახლეები