COVID - 19
02-07-2020 12:45

დავით ზალკალიანი: ​საქართველო ერთადერთი ქვეყანაა რეგიონში, რომელიც ევროკავშირის სიაში მოხვდა

დავით ზალკალიანი: ​საქართველო ერთადერთი ქვეყანაა რეგიონში, რომელიც ევროკავშირის სიაში მოხვდა

ევროკავშირმა მიიღო უაღრესად მნიშვნელოვანი გადაწყვეტილება. რომ დააკვირდეთ იმ 15 უსაფრთხო ქვეყნის ჩამონათვალს, საქართველო ერთადერთი ქვეყანაა რეგიონში, რომელიც ამ სიაში მოხვდა. იქ არ არის არც ერთი აღმოსავლეთ პარტნიორი და ყოფილი საბჭოთა ქვეყანა - ამის შესახებ საგარეო საქმეთა მინისტრმა იმედის გადაცემა „ღია ეთერში“ განაცხადა.

დავით ზალკალიანის შეფასებით, ეს არის მნიშვნელოვანი აღიარება იმ წარმატებისა და ეფექტიანი საქმიანობის, რომელიც საქართველოს მთავრობამ პანდემიასთან ბრძოლის მიმართულებით განახორციელა.

„ვფიქრობ, ჩვენ მართლაც ვიმსახურებთ, საქართველო იყოს ამ უსაფრთხო ქვეყნების ჩამონათვალში. ჩვენმა ოპონენტებმა კი დაიწყეს საუბარი იმაზე, რომ საქართველომ თითქოს და დაკეტა საჰაერო სივრცე და აღარავის უშვებს, მაშინ როდესაც განიხილება საქართველოს საკითხი. როგორ გგონიათ, პასუხისმგებლიანმა ხელისუფლებამ, რომელმაც ასე წარმატებით გაართვა თავი ურთულეს პრობლემას - პანდემიას და ჩვენ გვაქვს საუკეთესო მონაცემები რეგიონში. არა მხოლოდ რეგიონში, ევროპის მასშტაბით, არ ექნებოდა შესაბამისი კონსულტაციები ევროპელ პარტნიორებთან იმასთან დაკავშირებით, თუ როდის უნდა გავხსნათ საჰაერო სივრცე და როდიის უნდა მოხდეს ფრენების გამოცხადება? ეს ყველაფერი იყო კოორდინირებული და მათთან კონსულტაციების შემდეგ მიღებული გადაწყვეტილება.ეს გადაწყვეტილება სწორი და მართებული რომ იყო, დღევანდელმა მოცემულობამაც ძალიან კარგად დაგვანახა“- განაცხადა საგარეო საქმეთა მინისტრმა.

მისივე თქმით, ევროკავშირი აძლევს წევრ ქვეყნებს რეკომენდაციებსა და მოქნილობას იმასთთან დაკავშირებით, რომ თვითონ განსაზღვრონ ამ 15 ქვეყანასთან რა პროცედურებით და რა ზომებით გახსნას საზღვრები.

დღეიდან ევროკავშირის წევრი სახელმწიფოები მესამე ქვეყნების მოქალაქეებს საზღვრებს გაუხსნიან. შეზღუდვა უქმდება საქართველოსთვისაც, რომელიც ევროკავშირმა უსაფრთხოდ აღიარა.


წყარო : imedinews.ge

კომენტარები
        მსგავსი სიახლეები