COVID - 19
15-08-2020 16:27

კორონავირუსის 15 ახალი შემთხვევიდან ერთის ინფიცირების წყარო ჯერჯერობით უცნობია

კორონავირუსის 15 ახალი შემთხვევიდან ერთის ინფიცირების წყარო ჯერჯერობით უცნობია

საქართველოში კორონავირუსის 15 ახალი შემთხვევიდან ერთის ინფიცირების წყარო უცნობია. ამის შესახებ მარინა ეზუგბაიამ განაცხადა. თბილისის ინფექციური საავადმყოფოს სამედიცინო დირექტორის თქმით, ახალი შემთხვევების უმეტესობა მესტიის მუნიციპალიტეტს უკავშირდება.

„9 დადასტურებული შემთხვევა არის მოგზაურობა ამ ეპიდაფეთქების ზონაში, 4 შემთხვევა გახლავთ დადასტურებულ შემთხვევათა კონტაქტები. ერთი გახლავთ შემოტანილი - სატვირთო ავტომობილის მძღოლი გახლავთ და ერთ შემთხვევაზე გრძელდება ეპიდ-კვლევა კონტაქტების მოძიებისა და წყაროს დადგენის თვალსაზრისით“, - განაცხადა ეზუგბაიამ.

ამ დროისთვის საქართველოში კორონავირუსის 1321 შემთხვევაა დადასტურებული. განკურნებულთა რაოდენობა სულ 1088-ს შეადგენს. უცხოეთიდან სამკურნალოდ გადმოყვანილია საქართველოს 41 მოქალაქე. კორონავირუსის შედეგად, ქვეყანაში 17 პაციენტი გარდაიცვალა.

ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა. 21 მარტს საქართველოში საგანგებო მდგომარეობა ამოქმედდა, 31 მარტიდან კი - საყოველთაო კარანტინის რეჟიმი.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.

წყარო : https://imedinews.ge/

კომენტარები
        მსგავსი სიახლეები