COVID - 19
15-09-2020 21:18

აშშ-ს ექსპერტები უკრაინის ნატოში შესვლას შეუძლებლად მიიჩნევენ

აშშ-ს ექსპერტები უკრაინის ნატოში შესვლას შეუძლებლად მიიჩნევენ

შეერთებულ შტატებში ერთ-ერთი ავტორიტეტული ანალიტიკური ცენტრის, "Defense Priorities" ექსპერტებმა, მრავალი მიზეზის გამო, უკრაინის ნატოში შესვლა შეუძლებლად მიიჩნიეს. ანგარიშში ნათქვამია, რომ თეთრი სახლის პოლიტიკამ პრიორიტეტი უნდა მიანიჭოს უკრაინის გამო პირდაპირი სამხედრო შეტაკების საშიშროების მინიმალიზაციას. პოლიტოლოგ ბარი პოზენის აზრით, შეერთებულ შტატებს უკრაინის მიმართ არ გააჩნია სასიცოცხლოდ მნიშვნელოვანი ინტერესი - ისეთი, რომლისთვისაც მათ უღირთ იქ ამერიკული ჯარის გაგზავნა, რათა ისინი "ამ იდეისთვის კლავდნენ ან იხოცებოდნენ".

ამერიკელი ანალიტიკოსების აზრით, უკრაინის ნატოში გაწევრიანება შეუძლებელია მრავალი მიზეზის გამო. პირველი მიზეზი არის უკრაინელებს შორის კონსენსუსის არარსებობა ჩრდილოატლანტიკურ ალიანსში გაწევრიანების აუცილებლობის შესახებ. მთლიანობაში, როგორც ცენტრის ანგარიშშია აღნიშნული, ნატოში გაწევრიანების მომხრე გამოკითხულთა ნახევარზე ნაკლებია და მხოლოდ 25 პროცენტმა დაუჭირა მხარი ნებართვას მათ ტერიტორიაზე ალიანსის ძალების განლაგების შესახებ. მეორე მიზეზი კი, დამკვირვებლების მტკიცებით, ისაა, რომ, ნატოს გაფართოების წინა პერიოდებთან შედარებით, სტრატეგიული გარემო ცენტრალურ და აღმოსავლეთ ევროპაში მნიშვნელოვნად შეიცვალა. გარდა ამისა, მაშინაც კი, თუ ვივარაუდებთ, რომ უკრაინა შეიძლება ნატოში გაწევრიანდეს, ეს სერიოზულ კითხვებს წარმოშობს თავდაცვისუნარიანობასთან დაკავშირებით. ანალიტიკოსები აღნიშნავენ, რომ ალიანსს მოუწევს საზღვრის დაცვა, რომელიც დაახლოებით ნიუ-იორკსა და მაიამის შორის მანძილს უდრის. ამის გამო ჩრდილოატლანტიკურმა ალიანსმა და შეერთებულმა შტატებმა უარი უნდა თქვან თავიანთ საჯარო პოზიციაზე უკრაინის შესაძლო წევრობის მხარდასაჭერად, - აღნიშნულია ანგარიშში.

და ბოლოს, ექსპერტების აზრით, უკრაინის ალიანსთან მიერთების მცდელობა მისთვის შესაძლოა ყველაზე უარესი ვარიანტი იყოს. ამის მაგივრად, ნატოში გაწევრიანების საკითხის ამოღება განხილვიდან ოფიციალურ კიევს აიძულებს, ყურადღება გაამახვილოს უფრო რეალისტურ ვარიანტებზე, როგორიცაა ნეიტრალიტეტი. ანალიტიკოსები მიიჩნევენ, რომ ფორმალური მიუმხრობლობა ხელს არა მხოლოდ რუსეთთან ურთიერთობაში დაძაბულობის შემცირებას შეუწყობს, არამედ უკრაინას საშუალებას მისცემს, ყურადღება გაამახვილოს საშინაო პრობლემებზე, როგორიცაა კორუფცია და ეკონომიკური რეფორმები. კიევის ამჟამინდელი ამოცანაა შეიმუშაოს მიდგომა, რომელიც აღიარებს ამ შეზღუდვებს და იპოვის ბალანსს დაპირისპირებულ ძალებს: აღმოსავლეთსა (რუსეთი) და დასავლეთს (ევროპა) შორის. ამასთან დაკავშირებით შეერთებულმა შტატებმა უნდა გამოიყენოს თავისი გავლენა, რათა დაეხმაროს უკრაინას, გაიაროს რთული გზა საზოგადოების დასტაბილურებისათვის, - დაასკვნეს ექსპერტებმა.

[ წყარო - https://www.defensepriorities.org/explainers/saying-no-to-nato-options-for-ukrainian-neutrality?fbclid=IwAR09XOJK6GWOCvcaQoJN1Vy6ME5FKmrShaaQSfAmcP4g-p33DVE1oZjZGRM ]

კომენტარები
        მსგავსი სიახლეები