COVID - 19
23-10-2020 13:52

FDA-მ აშშ-ში რემდესივირი COVID-19-ის სამკურნალო პრეპარატად ოფიციალურად დაამტკიცა — #1tvმეცნიერება

FDA-მ აშშ-ში რემდესივირი COVID-19-ის სამკურნალო პრეპარატად ოფიციალურად დაამტკიცა — #1tvმეცნიერება

აშშ-ის სურსათისა და მედიკამენტების ადმინისტრაციამ (FDA) ანტივირუსული პრეპარატი რემდესივირი COVID-19-ით ჰოსპიტალიზებულ პაციენტთა სამკურნალოდ ოფიციალურად დაამტკიცა.

რემდესივირის პირველი ცდა პაციენტთა მცირე ჯგუფზე დასრულდა — შედეგები იმედისმომცემია
მსგავსი: რემდესივირის პირველი ცდა პაციენტთა მცირე ჯგუფზე დასრულდა — შედეგები იმედისმომცემია
მწარმოებელი კომპანია „გილეადი“ აღნიშნავს, რომ ბაზარზე „ვეკლარის“ ბრენდული სახელით არსებული პრეპარატი ამჟამად COVID-19-ის სამკურნალო ერთადერთი საშუალებაა, რომელიც ტესტირების რთული პროცესის გავლის შედეგად დამტკიცდა.

მიუხედავად იმისა, რომ გადაუდებელი გამოყენების უფლება სხვა პრეპარატებსაც აქვს მიღებული, კორონავირუსის პანდემიის დასრულების შემდეგ, გამოყენების უფლება მათ შეიძლება ჩამოერთვას.

COVID-19-თან საბრძოლველად ამჟამად იყენებენ სტეროიდულ პრეპარატ დექსამეტაზონსაც.

განცხადების შემდეგ, ნიუ-იორკის საფონდო ბირჟაზე „გილეადის“ აქციების ფასმა ოთხი პროცენტით მოიმატა.

„სურსათისა და მედიკამენტების ადმინისტრაცია მოწოდებულია, რომ დააჩქაროს COVID-19-ის პრეპარატების განვითარებისა და ხელმისაწვდომობის პროცესი საზოგადოებრივ ჯანდაცვაში არსებული უპრეცედენტო, გადაუდებელი მდგომარეობის პირობებში“, — ამბობს FDA-ის კომისარი სტივენ ჰანი.

მისივე განცხადებით, პრეპარატის დამტკიცებას მხარს უჭერს იმ მრავალი კლინიკური ცდის მონაცემები, რომლებიც სააგენტომ მკაცრად შეაფასა და წარმოადგენს მნიშვნელოვან სამეცნიერო ეტაპს COVID-19-ის პანდემიაში.

რემდესივირს დროებითი დასტური მისცეს კანადამ და ევროპის ქვეყნებმაც.

უსაფრთხოების გამო, COVID-19-ის რამდენიმე ვაქცინისა და პრეპარატის ცდა დროებით შეჩერდა — რატომ არის ეს კარგი და რა პროცესებს გადის ცდები #1tvმეცნიერება
მსგავსი: უსაფრთხოების გამო, COVID-19-ის რამდენიმე ვაქცინისა და პრეპარატის ცდა დროებით შეჩერდა — რატომ არის ეს კარგი და რა პროცესებს გადის ცდები #1tvმეცნიერება
რემდესივირი ინექციით კეთდება და ერთ-ერთი პირველი პრეპარატი იყო, რომელმაც შედარებით იმედისმომცემი შედეგი აჩვენა კორონავირუსის ზოგიერთ პაციენტში — შეამცირა გამოჯანმრთელებისთვის საჭირო დრო.

თუმცა უნდა აღინიშნოს, რომ ჯერ დაუდასტურებელია მისი ეფექტიანობა სიკვდილიანობის შემცირების მხრივ.

მისი მიღება დაშვებულია 12 წლის ზემოთ ადამიანებისთვის, რომლებიც 40 კილოგრამზე მეტს იწონიან და რომლებსაც, COVID-19-ის სამკურნალოდ ჰოსპიტალიზება სჭირდებათ. პრეპარატის მიღება პაციენტისთვის მხოლოდ საავადმყოფოშია დაშვებული.

FDA-ის გადაწყვეტილებით, გადაუდებელ შემთხვევაში რემდესივირის მიღება დაშვებულია 12 წლამდე ბავშვებშიც, რომლებიც სულ მცირე 3,5 კგ-ს იწონიან.

პრეპარატი თავიდან ებოლას ვირუსული ჰემორაგიული ცხელების საწინააღმდეგოდ შეიქმნა.

როდის და როგორ სრულდება პანდემიები — როგორია ისტორიული გამოცდილება #1tvმეცნიერება
მსგავსი: როდის და როგორ სრულდება პანდემიები — როგორია ისტორიული გამოცდილება #1tvმეცნიერება
თებერვალში, აშშ-ის ალერგიისა და ინფექციურ დაავადებათა ეროვნულმა ინსტიტუტმა (NIAID) განაცხადა, რომ იწყებდა რემდესივირის ტესტირებას SARS-CoV-2-ის წინააღმდეგ, პათოგენის, რომელიც დაავადება COVID-19-ს იწვევს.

კვლევაში ათასზე მეტი ადამიანი იყო ჩართული და აპრილში გამოქვეყნებული შედეგების მიხედვით, პრეპარატზე მყოფი 31 ადამიანი უფრო მალე გამოჯანმრთელდა, ვიდრე ისინი, ვისაც პლაცებო ჰქონდა მიღებული.

გამომდინარე იქიდან, რომ რემდესივირის წარმოება კომპლექსურია და ადამიანს უფრო ინექციით უკეთდება, ვიდრე აბის სახით, გაჩნდა კითხვა, რამდენად მოხერხდებოდა საკმარისი რაოდენობით წარმოება-მიწოდება.

აშშ იმდენად დარწმუნებული იყო რემდესივირის წარმატებაში, რომ „გილეადის“ ზაფხულის წარმოება მთლიანად შეიძინა.

მომზადებულია Agence France-Presse-ის მიხედვით.

FDA-მ აშშ-ში რემდესივირი COVID-19-ის სამკურნალო პრეპარატად ოფიციალურად დაამტკიცა — #1tvმეცნიერება



ავტორი - მიხეილ ჭაბუკაშვილი
წყარო: 1tv.ge

კომენტარები
        მსგავსი სიახლეები