COVID - 19
28-01-2020 18:38

პაატა იმნაძე: საქართველოში კორონავირუსის გავრცელების მაღალი რისკი არ არსებობს

პაატა იმნაძე: საქართველოში კორონავირუსის გავრცელების მაღალი რისკი არ არსებობს

საქართველოში ახალი კორონავირუსის გავრცელების რისკი დაბალია, - ამის შესახებ იმედის გადაცემა „დღის ქრონიკაშ“ დაავადებათა კონტროლის და საზოგადოებრივი ჯანმრთელობის ეროვნული ცენტრის დირექტორის მოადგილემ განაცხადა.

პაატა იმნაძის თქმით, საქართველოს ჩინეთის ქალაქ უხანთან პირდაპირი ფრენები არ აქვს, რაც ჩვენ ქვეყანაში დაავადების გავრცელების რისკს ამცირებს.

„ჩვენ არ ვართ ისეთი მაღალი რისკის ქვეშ, ისევე როგორც ევროპის თითქმის ყველა ქვეყანა, რადგანაც ჩვენ პირდაპირი რეისები აღარ გვაქვს უხანთან საქართველოში. გამონაკლისი იყო პარიზი, სადაც არის 6 ფენა კვირაში. აღარ იქნება ეს ფრენებიც, იმიტომ რომ ჩაიკეტა უხანი“, - განაცხადა იმნაძემ.

მან კორონავირუსის ტექნიკური მხარეც განმარტა და ახსნა, რომ ამ ტიპის დაავადებები ადამიანსაც და ცხოველებსაც აქვთ. იმ შემთხვევაში თუ ცხოველის ვირუსის ფორმა ადამიანზე გადადის ის მძიმე ფორმით მიმდინარეობს. იმნაძის თქმით, ჯერჯერობით უცნობია რომელი ცხოველის კორონავირუსმა გამოიწვია ახალი ვირუსის გავრცელება ჩინეთში.

მისი განმარტებით, ვირუსს ჩვეულებრივი მძიმედ მიმდინარე რესპირატორული ინფექციისთვის დამახასიათებელი სიმპტომები ახასიათებს, მისგან ვაქცინა კი ამ ეტაპზე არ არსებობს. იმნაძემ მოქალაქეებს შეახსენა, რომ თუ ბოლო 2 კვირის განმავლობაში უხანში იყვნენ და გაციების სიმპტომები აქვს, ახალი ვირუსის გამოსარიცხად ინფექციურ საავადმყოფოს უნდა მიმართოს.

იმნაძე ზუგდიდში 22 წლის გოგოს გარდაცვალების ფაქტსაც გამოეხმაურა და აღნიშნა, რომ ამ ტრაგედიის სპეკულაციისთვის გამოყენება მიუღებელია.

„დასავლეთ საქართველოში საზიზღარი ჭორები აგორდა. ეს არის აბსოლუტური ტყუილი. ძალიან დიდი ტრაგედია მოხდა საქართველოში, ახალგაზრდა ქალი გარდაიცვალა. უკვე დადასტურებულია, რომ ეს იყო ბ-ტიპის გრიპის ვირუსი. სამწუხაროდ გავრცელდა ძალიან უსინდისო ტყუილები, რომ ეს იყო დაკავშირებული (კორონავირუსთან). არანაირი კავშირი არც ჩინეთთან, არც უხანთან არ ყოფილა. ტრაგედიის გამოყენება არ შეიძლება სპეკულაციისთვის“, - განაცხადა იმნაძემ.

ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

ვირუსი უკვე დაფიქსირდა ჩინეთის გარეთ - ტაილანდში, იაპონიაში, სამხრეთ კორეასა და აშშ-ში. 21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა. ჩინეთში საქართველოს საელჩოში კი ცხელი ხაზი მოქმედებს.

ემუქრება თუ არა მსოფლიოს ახალი ეპიდემია, ვრცლად შეგიძლიათ წაიკითხოთ ბმულზე.

[ წყარო - https://imedinews.ge ]

კომენტარები
        მსგავსი სიახლეები